Lajme

Durrës: Policia arreston “terrorin” e pushuesve

Policia e Durrësit ka bërë të mundur arrestimin e shtetasit Donald Mëziri, 23 – vjeç.

Mëziri ishte kthyer në tmerrin e kujtdo që kishte një makinë.

23 – vjeçari Mëziri ishte një mjeshtër i vjedhjes së sendeve me vlerë apo parave në makinat e qytetarëve.

Edhe pse banonte në Kamëz, 23 vjeçari kishte zgjedhur zonën e Durrësit për të kryer vjedhjet.

Metoda që përdorte ishte e thjeshtë, thyente xhamat e makinës dhe vidhte çdo gjë me vlerë që gjente në to.

Sipas burimeve nga policia janë dokumentuar të paktën 7 raste që janë kryer nga dora e 23 vjeçarit.

Për dy muaj me radhë, Donald Mëziri kryente vjedhjet në Durrës, duke patur parasysh dhe sezonin veror dhe rritjen e fluksit të pushuesve në qytetin bregdetar.

Raporti i policisë mbi vjedhjet e dokumentuara, të kryera nga Mëziri:

“Specialistët për Krimet në Komisariatin e Policisë Durrës, në vijim të punës për zbardhjen dhe dokumentimin e plotë të ngjarjeve të ndodhura në territorin e tyre, me qëllim vënien para përgjegjësisë penale të autorëve, kanë vënë në pranga një shtetas, i cili vidhte sende me vlerë dhe vlera monetare duke thyer xhamat e automjeteve.

U arrestua në flagrancë shtetasi: Donald Mëziri 23 vjeç, banues në Kamëz, Tiranë, i dënuar më parë për veprat penale kundër personit dhe pronës.

Specialistët e Seksionit për Hetimin e Krimeve të Komisariatit të Policisë Durrës, pas një pune hetimore 2- mujore intensive dhe të mirëorganizuar kanë  bërë të mundur  dokumentimi e  plotë ligjor, të veprimtarisë kriminale e dyshuar e kryer nga shtetasi i mësipërm për ngjarjet si më poshtë vijojnë:

Më datë 01.06.2017, në lagjen Nr.4, Durrës dyshohet se në mjetin tip Benz në pronësi të shtetasit M.R. ka vjedhur një çantë me dokumenta dhe 8 000 lekë.

Më datë 14.06.2017, në fshatin Draç, Durrës  dyshohet se në mjetin tip BMW, më pronësi të shtetasit I. Xh. i ka vjedhur 1 orë dore.

Më datë 18.06.2017, tek Gjiri i Lalëzit, Durrës dyshohet se mjetin tip Benz në pronësi të shtetasit A. P. ka vjedhur 2 ora dore dhe rroba.

Më datë 12.07.2017, në Rrugën “Taulantia”, Durrës dyshohet se në mjetin tip Benz, në pronësi të shtetasit V. R. ka vjedhur 77 000 lekë.

Më datë 29.07.2017, në lagjen Nr.13, Durrës dyshohet se duke thyer xhamin e pasëm në mjetin e shtetasit S. R. ka vjedhur rroba dhe një aparat fotografik.

Më datë 05.08.2017, në lagjen Nr.1, Durrës dyshohet se në mjetin tip Porshe në pronësi të shtetasit R. G. ka vjedhur çantën e dorës me një shumë prej 2000 €.

Më datë 17.08.2017, në lagjen Nr.1, Durrës dyshohet se në mjetin tip Volsvagen në pronësi të shtetasit F. H. ka vjedhur një çantë me dokumenta dhe 562 000 lekë.

Vijon puna për identifkimin dhe kapjen e autorëve të tjerë të implikuar në këtë veprimtari kriminale.

Materialet i kaluan Prokurorisë së Rrethit Gjyqësor Durrës për veprime të mëtejshme për veprën penale “Vjedhja e pasurisë e kryer më shumë se një herë” në bashkëpunim parashikuar në nenin 134/2  të Kodit Penal”.

Më shumë

Artikuj të ngjashëm