Shtërmeni për shtangën shqiptare është njëlloj si Brazili për futbollin botëror. Një hambar kampionësh dhe talentesh që rriten në fshatin e vogël të Peqinit. I fundit në radhën e kampionëve të peshengritjes të rritur në Shtërmen është Ertjan Kofsha, kampioni më i ri europian i cili ka mahnitur me paraqitjen e tij në Kampionatin Europian të peshëngritjes për moshat U-15 dhe U-17, që po mbahet në Raszyn të Polonisë.

Talenti i stërvitur nga trajneri i mirënjohur Leonard Toska ka fituar tre të arta në kategorinë U-17. Ai shkëlqeu në kategorinë deri 89 kg. duke lënë pas gjithë rivalët bashkëmoshatarë me 145 kg. në stilin e shkëputjes, 168 në stilin e shtytjes, duke e mbyllur dygarëshin me 308 kg.

Arritje fantastike për adoleshentin kuqezi që mund të konsiderohet edhe si e ardhmja e shtangës shqiptare dhe shpresa më e madhe për Shqipërinë në ëndrrën për të fituar një medalje olimpike. Delegacioni shqiptar e mbylli aventurën e të rinjve në Poloni edhe më një sukses tjetër, atë të Enkileda Carjas që u rendit e treta në kategorinë U-15.